Сертификати за Обуки за работни вештини- олеснување на патот кон првото вработување

editor — Wed, 01 Feb 2012 19:15:42 +0000

Вчера на 31ви јануари им беа доделени сертификати на сите учесници кои успешно ги поминаа обуките за работни вештини.

Во периодот од октомври до декември 2011-та се одржа уште еден циклус на обуки за работни вештини во Скопје, Тетово, Штип, Струга и Битола каде што 150 млади луѓе се стекнаа со различни работни вештини, подготвени за вработување во македонските компании. Циклусот обуки организиран во петте градови беше дел од проектот Младинска независност и реализиран во соработка со 3 локални организации: Фондација за развој на локалната заедница – Штип, Младински културен центар – Битола и Здружение за развој и активизам АКВА – Струга.

Со доделувањето на сертификатите официјално заврши и самиот проект кој траеше две години од февруари 2010 до јануари 2012.

Во текот на овие две години беа организирани неколку циклуси за Обуки за работни вештини каде 400 млади луѓе се стекнаа со работни вештини и добија сертификати, кои ќе им го олеснат патот кон првото вработување . Овие обуки имаа за цел да ги надградат овие 400 млади со вештини и способности кои е невомозможно да се стекнат во формалното образование.

Учесниците на обуките се стекнаа со следните работни вештини:

1.   Комуникациски вештини
2.   Организирање на настани
3.   Лидерство, мотивација и тимска работа
4.   Претприемничтво и бизнис план
5.   Проектен циклус менаџмент
6.   Европски фондови
7.   Вовед во маркетинг и онлајн маркетинг

Прогласени најдобрите дебатери од проектот „Младинска независност“

editor — Tue, 31 Jan 2012 14:56:05 +0000

Како финален настан на проектот „Младинска независност“ учесници од вербал клубовите во тимови од по двајца се натпреваруваа за прво место на турнирот во Британска праламентарна дебата. Вкупно 8 тима се натпреваруваа во две рунди по што беа прогласени и победниците на самиот турнир. Распоредот на број на тимови беше следниот:

•   2 тима Тетово
•   1 тим Струга
•   2 тима Штип
•   2 тима Скопје
•   1 тим Битола

Тезите за овој турнир беа:

Рунда I: Овој дом верува дека треба да има афирмативна акција за млади при вработување во државни институции.
Рунда II: Овој дом верува дека треба да има бесплатно високо образование за сите.

Победници на турнирот беа:
Најдобар тим: Тетово II – Игор Стаменковски и Моника Мирчевска

Најдобар говорник: Кристијан Панев од Штип.

Честитки од тимот на „Младинска независност“

БП дебата во живо

editor — Fri, 20 Jan 2012 14:59:51 +0000

>Денес во 19 часот во просториите на Младински образовен форум ќе се одржи дебата во форматот ,,Британска парламентарна дебата“, која ќе се пренесува во живо преку онлајн стриминг.
Ако сакате да видите како изгледа овој формат и како може да изгледа аргументирана дискусија, следете го стримот и видете ги фактите кои дебатерите можата да ги приложат и како тече една организирана и структурирана дискусија.

Според правилата на форматот (http://www.youtube.com/watch?v=d1ype0Toqo4) тезата (темата на дискусија) ќе биде најавена 15 минути пред почетокот на дебатата.
Дебатата која ќе се емитува е презентативна дебата за 5 вербал кластери од проектот ,,Младинска независност“ кои се спремаат за турнир во овој формат.

Live broadcasting by Ustream

Овој дом верува дека училиштата во Македонија (не) ја поттикнуваат креативноста кај младите

editor — Fri, 30 Dec 2011 11:29:58 +0000

На 27.12.2011 во амфитеатарот на Универзитетот ФОН во 14 часот се одржа Британска парламентарна дебата со теза “Овој дом верува дека училиштата во Македонија (не) ја поттикнуваат креативноста кај младите“.

Целта на дебата беше да се потикне дискусија за тоа дали нашиот училишен систем потикнува креативност кај младите, и уште повеќе дали системот ја стимулира креативноста. Заклучокот од дебатата беше дека освен училиштата кои можат и требаат да ја стимулираат креативноста, младите треба и сами преку вон училишни активности да изнајдуваат креативни решенија на младинските проблеми.

Со оваа дебата членовите на Вербал кластерот од Струга го промовираа тоа што го стекнале како знаење и искуство во текот на овие две години.

Презентација на видеа во Струга

editor — Tue, 27 Dec 2011 10:57:45 +0000

На 25.12.2011 во недела, во Албум кафе- Струга се одржа промоција на струшкиот арт кластер преку прокеција на видеа кои се прозивод на младите членови од е/арт кластерот.

Видеата кои беа презентирани се со две теми: локални проблеми поврзани со урбанизмот во Струга и стереотипите кои постојат во Македонското општество.

Настанот продолжи со настап на Марјан Ѓоргиевски комичар кој преку хумор ги потенцираше Струшките локални проблеми.

Проекцијата на видеата ќе продолжи и во деновите кои следат, односно на 28, 29 и 30.12.2011.

Настанот беше посетен од околу 200 гледачи и слушатели.

Биди ти, тргни ги сите маски!

editor — Sun, 25 Dec 2011 12:16:37 +0000

Сабота, 24.12.2011, најфреквентата улица во Штип – „Ванчо Прќе“ блесна со нов шарм, доби изглед на голема театарска сцена. Петнаесетина млади активисти, членови на арт-клубот основан со проектот „Младинска независност“ ги поставуваа маските околу дрворедот долж улицата, а меѓу нив ги поставија пораките наменати за младите, во кои стоеја пароли и повик до сите млади да бидат независни, да бидат активни, да ги отстранат маските под кои морат да се кријат за да бидат прифатени од средината и да се изборат со апатијата и инфериорнаста на општеството кон младите.

Настанот претставува комбинација од мини флеш моб и инсталација под мотото “Биди ти, тргни ги сите маски“. Започна со поставувањето на маските, во 10 часот- време кога улицата е најраздвижена, и продолжи со поставувањето на пораките меѓу маските, со пантонима која асоцира на отргнување од маската и покажување на „вистинското јас“. На крајот, по поставувањето и на последната маска, ја избришаа својата маска, без израз на лицето, и се изгубија во толпата, секој на различна страна.

Целта на настанот е на креативен начин да се охрабрат младите да се оттргнат од своите идоли, да бидат оригинални, да се почитуваат себеси и да ги почитуваат разликите, да не ги премолчуваат своите потреби и да се активираат за унапредување на својата позиција во општеството.

Настанот привлече внимание меѓу случајните минувачи кои беа воодушевени од креативноста на младите. Обичните граѓани на моменти беа во дилема дали е новогодишно украсување на улицата или некој патувачки циркус кој приредува забава со цел да им го разубави денот, сепак тоа беше само креативноста на младите од арт кластерот од проектот ,, Младинска независност“.

ЕКТС (не) е клучен елемент за квалитетот на универзитетската настава

editor — Sun, 25 Dec 2011 11:37:59 +0000

На 24.12.2011 во хотел Оаза во Ш0тип со почеток од 12 часот се одржа јавна дебата на тема: „ЕКТС (не) е клучен елемент за квалитетот на универзитетската настава“. Дебатата е во организација на Фондацијата за развој на локалната заедница Штип и Младински образовен форум Скопје, како финален настан на вербал клубот дел од проектот „Младинска независност“.

Цел на дебатата беше младите да дадат свој придонес во зголемувањето на квалитетот на образованието преку дискусија за недостатоците во наставата и давање препораки за нивно елиминирање, како и да се мотивираат студентите, активно да учествуваат во подобрување на имплементацијата на ЕКТ системот.

На дебатата афирмативниот тим ја потврди тезата дека токму ЕКТС е клучниот елемент кој го унапредува квалитетот на нашиот образовен систем, дека со него се создадени услови за мобилност на студентите, унификација на остварените резултати при студирањето, а пак за наводната неинформираност на студентите за неговата практична употреба не се виновни институциите туку е плод на незаинтересираноста на самите студенти.

Негативниот тим пак произлезе со ставови дека клучниот проблем е всушност неинформираноста на студентите за системот, неможноста да се информираат за деталите, не постоењето на публикации или било какви форми на информирање, а институциите воопшто не помагаат во тоа. Друг аргумент во врска со имплементацијата на ЕКТС беше дека е оставено на универзитетскиот кадар поединечно да го толкува и импплементира системот.

Универзитетот Гоце Делчев Штип беше претставуван од проф.д-р Кирил Барбареев, воедно и портпарол на универзитетот за односи со јавност искажа благодарност и задоволство од организирањето на дебата на тема која е постојано актуелна во академска средина како што е Штип. Притоа истакна дека се согласува со забелешките и на двата тима и додаде дека самиот процес на унапредување на квалитетот на образованието и ЕКТС како алатка за тоа е жив и динамичен процес на кој треба постојано да се работи, да се надградува во соработка со институциите, со младинските организации кои даваат допринeс во таа сфера и секако со самите студенти. Се повика на бенефитите кои ги нуди ЕКТС, а како најважни ги издвои мобилноста на студентите и кадарот, што преку размената на искуства и на научната мисла резултира со зголување на квалитетот на студиите. Ги потенцира и достигнувањата на УГД иако најмлад државен универзитет да воведе современи наставни методи и помагала, постојано технички ги унапредува лабараториите и институтите, па дури и е пионер во РМ во воведување на инвентивни алатки кака електронскиот индекс, електронско пријавување на испити, постојано ажурирање на веб сервисот, студентското радио, а започнат е процесот на отварање и организирање и на студентска телевизија.

Претставникот од МОФ, Атанас Димитров, пренесувајќи ги ставовите и искуството на својата организација се повика на искуството кое го има МОФ на темата, особено при изработката на брошурата на тема „ЕКТС-реалност или илузија во високото образование“. Според истражувањето на кое се повика говорникот, студентските парламенти на матичните факултети при УКИМ не ја следат доволно имплементацијата на ЕКТС при УКИМ, добар дел од факултетите немаат тематски единици од европски компаративни содржини, незабележителен е бројот на ЕКТС канцеларии на факултетите и никакви примери на практична соработка на универзитетите и стопанството.

Дебатата помина во пријатна атмосфера, заклучокот беше заеднички да се пристапи во подобрувањето на условите за студирање и секој да даде придонес во решавањето на сите наведени аномалии на образовниот систем. Дебатата беше проследена и од локалните медиуми.

“Што си ти? Ти си исто што и јас!”

editor — Sat, 24 Dec 2011 17:00:24 +0000

“Овој дом верува дека интеграцијата ќе успее” беше пораката што денеска во супермаркетот Веро и низ улиците во Тетово ја испратија стотина средношколци, членови на Младинскиот образовен форум (МОФ).

Целта на настанот беше да се поттикнат младите да размислат што имаат заедничко со своите врсници и да се спротистават на сегрегацијата која произлегува од културните, етничките и верските разлики. Младите Македонци, Албанци, Турци, Роми и други порачаа дека имаат заеднички проблеми и интереси и дека ќе работат на промоција на овие сличности, а во исто време и на почитување на разликите.

Младите од Тетово, Струга, Кичево, Дебар и Скопје ги “окупираа” супермаркетот и главната улица, а во одреден момент се “замрзнаа” и со транспаренти упатија порака до секој од случајните минувачи: “Што си ти?”. Распределени во улога на жена, човек, активист, студент, планинар и други профили, учесниците беа едногласни во одговорот: “Ти си исто што и јас”.

Со овие пораки младите побараа од институциите доследна имплементација на Стратегијата за интегрирано образование како предуслов за соживот и заеднички развој, а своите врсници ги повикаа да се приклучат кон било која форма на младински активизам во своите локални средини и на таков начин да се спротистават на поделбите.

Денешните активности на МОФ во Тетово ќе завршат со презентативна Британска парламентарна дебата на темa “Овој дом верува дека стратегијата за интегрирано образование ќе успее”.

Јавноста е жедна за дебата

editor — Thu, 15 Dec 2011 12:53:40 +0000

На двочасовната дебата на настанот Аргумент – Организирано изразување во организација на Младински образовен форум, која се одржа вчера во конгресниот центар City Hall, претставници од двете најголеми политички партии ги судрија ставовите за нивото и квалитетот на дебата и дискусија во Македонија. Премисата дека Македонија е парламентарна држава и дека парламентот и медиумите се двете места каде што можеме да следиме квалитетна дебата на важни општествено–политички прашања беше дискутирана од страна на присутните пратеници, новинарите како гости говорници и бројната публика.

Поделени во афирмативен и негациски тим според ставовите кои јавно ги застапуваат Александар Спасеновски и Влатко Ѓорчев од едната и Радмила Шекеринска и Игор Ивановски од спротивната страна дебатираа на тезата „Овој дом верува дека во Македонија (не) постои доволно дебата за развoj на демократијата“. Дебата се одвиваше во формат подготвен од МОФ кој овозможуваше еднакво учество на сите говорници во дискусијата и простор за судир на ставови.

Афирмативната страна ја застапуваше страната дека во Македонија постои дебата и во медиумскиот простор и во Собранието чии што седници се јавни и отворени за граѓаните на Собранискиот ТВ канал. Дополнително, дискусија постои и во онлајн сферата, а особено на социјалните мрежи. Сепак, заклучокот е дека никогаш не може да постори доволно дебата во едно општество и дека секогаш треба да се стремиме кон повеќе.

„Квалитетот на демократијата покрај алатките кои постојат зависи и од политичките партии. Покрај достапните алатки зависи и од опозицијата. Ако го земеме за пример Собранието на Македонија, ќе забележиме дека постојат мноштво механизми кои ни се достапни, но карактерот на дискусијата зависи од оние кои ги користат.“ – Александар Спасеновски

Негативната страна пак тврдеше дека дебатата ја нема, ни во Собранието ни во медиумите. Според негативната аргументација собраниската дебата не може да се нарече дека е дебата која води кон демократија, а медиумите не се однесуваат како независни извествувачи. Опозицијата истакна и дека овој настан, иако во квалитетна форма на структурирана дебата пред и со јавноста, не може да се смета за постоење на дискусија затоа што претставува реткост во јавната сфера, а не пракса во земјата.

„Проблемот во Македонија е во тоа што последниве години се навикнуваме дека нема дебата. Зборуваме за парламентот како место каде што се одвива дебата, но всушност таму имаме власт која крева рака и гласа и опозиција која критикува. Во Македонија нема дебата бидејки и медиумите се под стеги на власта. Во Македонија имаат слобода да говорат сите, се додека не се затворени и нивните фамилии сатанизирани. Има слобода само за оние кои имаат дозвола за слобода. (…) На најважната тема во Р. Македонија, проблемот со името, наместо дебата имаме најголема тишина. Кога во една држава се молчи за најважните прашања, нема демократија “ – Радмила Шекеринска

„Во оваа држава каде што секој граѓанин смета дека го прислушкуваат, дали мислите дека во ваква држава има демократија?“ – Игор Ивановски

На дебатата покрај пратениците кои беа во својство на дебатери, учество земаа и македонските новинари Оливера Трајковска, Снежана Лупевска и Мухамед Зекири во својство на гости говорници, кои го дадоа својот став на прашањето за дебатата во Македонија преку новинарската призма.

Снежана Лупевска ја нарече дебатата како само уште еден дијалог на глуви, каде двете страни дебатираат, но не се разбираат што сакаат да кажат. Упати критики кон двете страни, кон опозицијата која не ги искористува можностите кои и се нудат како опозиција и кон власта која дојде на власт а не се појави на лидерска дебата.

„Јас сметам дека дебата нема бидејки така сака политичкиот систем. Не сметам дека има дебата и во парламентот и би се согласила со опозицијата дека во парламентот власта само крева раце и гласа.“ – Оливера Трајковска
Трајковска својот говор го заврши со прашањето „Не е прашањето дали има дебата, туку дали публиката сака повеќе?“

„Во Македонија нема доволно дебата, но овој настан е добар репер дека во Македонија има надеж и има можност за дебата.“ – Мухамед Зекири

Дебатата беше проследена од 300 гледачи во салата, додека над 600 ја следеа преку преносот во живо на интернет. И во салата но и на социјалните мрежи се разви дискусија за дебатата, каде се цитираа најсилните изјави, се побиваа аргументи и се покренуваа нови прашања. Публиката на настанот покажа дека не само што е желна за дебата, но е и зрел учесник во дискусијата кој има многу прашања и ставови кои треба да бидат чуени.
Младински образовен форум го организира настанот Аргумент – Организирано изразување со цел да ја подигне културата на дијалог и квалитетот и етичноста на јавниот дискурс, да ги покрене важните прашања, но и да ги поттикне јавните лица за учество во фер и аргументирана дискусија.

Волонтирај, не импровизирај – Меѓународниот ден на волонтерство

editor — Tue, 13 Dec 2011 10:14:37 +0000

Младинскиот културен центар од Битола заедно со Младински образовен форум по повод 5ти Декември, Меѓународниот ден на волонтирањето одржа еднодневен настан кој беше волонтерска акција за промоција на волонтерската работа, волонтерските програми и презентација на волонтерството како вредност, а не цел. Во оваа акција беа вклучени 15 волонтери кои потсетија за вистинските вредности на волонтерската работа и ги претставија волонтерските програми во четири средни училишта во Битола. Настанот се одржа во Младински културен центар во Битола и истиот вклучи:

- 14.00 часот

Отворена дебата „Волонтерството – капитал кој вреди“.

Оваа дебата беше реализирана од Вербал клубот на МКЦ – Битола во склоп на проектот Младинска независност на Младински образовен форум. Целта на оваа дебата беше да се увидат разбирањата на младите луѓе за поимот волонтерство, дефинирајќи го волонтерството врз основа на реалната состојба која што не опкружува.

Модератор: Александар Тодоровски

Говорници: Иво Ивановски, Дејан Петровски, Симона Нечевска и Марија Шибевска.

На дебата беа присутни околку 30 гости.

- 18.00 часот

Арт перформанс „БОГ“ по сценарио на Вуди Ален

Перформансот вклучи 15 членови на Арт клубот кои имаа за цел да го претстават заедничкото работење во изминатите неколку месеци преку изразување на индивидуалните уметнички, креативни и актерски вештини кои ги поседуваат членовите. Перформансот беше изработен по текстот од драмата „Бог“ на Вуди Ален, кој за прв пат се одигра во Р. Македонија, а притоа беше прилагоден односно „одомаќинет“ на македонското секојдневие, култура и традиција. Перформансот се реализира во склоп на проектот Младинска независност на Младински образовен форум.

.На перформаност присуствуваа околу 120 гости.

- 19.00 часот

Свечена церемонија за доделување на златен, сребрен и бронзен сертификат за Волонтерски ангажман 2011.

Национални волонтерски награди по повод Меѓународниот ден на волонтирањето 5-ти декември.

- 19.15 часот

Концерт на групата „Guess Who? “